Delegacioni i Maqedonisë u largua parakohe nga Samiti në Bukuresht

Bukuresht, 3 prill (MIA) - Delegacioni i Maqedonisë edhe zyrtarisht u largua nga Samiti në Bukuresht, një ditë më parë. Presidenti i Maqedonisë, Branko Cërvenkovski dhe kryministri Nikolla Gruevski, menjëherë pas takimit me presidentin amerikan Xhorxh Bush, i cili vazhdon akoma, së bashku me gazetarët do të largohen nga Samiti në Bukuresht, njoftuan raportuesit e MIA-s. Cërvenkovski dhe Gruevski i anuluan të gjitha aktivitetet e mëtejme në Samit.

Kulla Eifel do të rimodelohet

Për të festuar 120-vjetorin e saj vitin tjetër, Parisi do të rimodelojë simbolin ikonik duke zgjeruar katin

e tretë të kullës Eifel.

Dizenjo është krijuar nga "Serero Architects", të cilët fituan konkursin e dizenjos.

"Rrudhat" do të ndërtohen me karbon "Kevlar" për t'u dhënë vizitorëve mundësinë të shohin çdo anë e cep të Parisit dhe ta dyfishojnë kapacitetin e platformës.

Nëse ky fakt nuk ju pëlqen dhe do të doni ta shihni kullën më të famshme të Evropës ashtu siç ka qenë, mos u mërzisni, struktura do të jetë e përkohshme.

Qëndrime të raportuesve të huaj nga Bukureshti për gjasat e Maqedonisë për në NATO

Bukuresht, 2 prill (MIA) - Maqedonia definitivisht duhet ta marrë ftesën për anëtarësim në Aleancë, ndërsa dallimet rreth emrit me Greqinë janë çështje të pastra dypalëshe, konsiderojnë një pjesë e gazetarëve që i përcjellin ngjarjet në Samitin e NATO-s në Bukuresht.

Maqedonia, Shqipëria dhe Kroacia duhet ta marrin ftesën për anëtarësim në NATO për shkak të shumë parimeve tjera të rëndësishme sesa lokale, konsideron Sokol Balla, redaktor i programit informativ në Top Channel nga Shqipëria.

"Çështja e emrit në njëfarë mënyre është bilaterale. Për Shqipërinë nuk është shumë me rëndësi nëse do ta quaj vendin tuaj Maqedoni, Maqedoni - Shkup apo Maqedonia e Re ose e Vjetër. Personalisht mendoj se për Maqedoninë kjo është më shumë çështje ekzistenciale sesa dypalëshe. Si do që të jetë, është e sigurt se Maqedonia nuk ka kurrfarë pretendime territoriale ndaj fqinjëve", konsideron Balla.

"Kjo çështje është mes Maqedonisë dhe Greqisë. Nëse e zgjidhni nuk do të ketë problem. NATO u prononcua se të gjitha tri vendet Maqedonia, Shqipëria dhe Kroacia kanë bërë mjaft, konsideron Shang Ksukia, gazetar nga agjencia kineze e lajmeve Ksinhua.

Sipas Shang, megjithatë askush nuk e di se çka do të bëjë Greqia, nëse do të vendosë veto në emrin për pranimin e Maqedonisë, edhe pse siç tha në të ka të drejtë të plotë.

Për Mihail Zakovskin, gazetar në radion e Polonisë, ky është samiti i parë i Aleancës me pikëpyetje të madhe. Një nga çështjet e humbura është edhe ftesa për anëtarësimin e Maqedoninë në NATO. Duke potencuar se çështja për emrin është dypalëshe mes Maqedonisë dhe Greqisë, Zakovski theksoi se anëtarësimi i Maqedonisë në NATO do të jetë hap përpara për stabilitetin e Ballkanit.

"Mendoj se do të ketë biseda dypalëshe mes Maqedonisë dhe "të mëdhenjëve" - SHBA dhe Francë, për shkak se duhet të tentoni të gjeni mbështetës nga vendet e mëdha", tha Zakovski.

Mihaela Omofrei, gazetare nga Radio Linoks e Rumanisë, vlerëson se Maqedonia duhet ta marrë ftesë për anëtarësim sepse është vend stabil, ndërsa nevojitet stabilitet politik dhe siguri në Ballkanin Perëndimor.

Paralajmërohet Peugeot 608

Prodhuesi francez i automjeteve, Peugeot, është duke punuar në pasardhësin e modelit të Peugeot 607, ndërsa sipas informatave më të reja, stili i këtij automjeti do të jetë i inspiruar nga modeli konceptual 908RC, i cili është prodhuar në vitin 2006.

Peugeot 608 do të bazohet në platformën e ngjashme sikurse Citroen C6, që do të thotë se do të jetë pak më i gjatë se modeli aktual 607, mirëpo prapëseprapë do të jetë më i shkurtë se pesë metra.

Pamja e jashtme do të paraqes evoluimin e dizajnit paraardhës, me ndikime të mëdha nga modelet e fundit konceptuale.

Në veçanti do të bazohet në modelin konceptual 908RC, i cili u paraqit në panairin e automjeteve të Parisit në vitin 2006. Në të njëjtën kohë pritet që ky model të jetë i përafërt me modelet kupe, të cilin e ka nisur CLS i Mercedesit.

Brendësia do të jetë standarde sikurse automjetet tjera të Peugeot, mirëpo duke ditur se flasim për një model që synon majat e shitjeve, pritet që të përfshijë edhe një numër të madh shtesash luksoze.

Motori do të jetë më i avancuar nga modelet e deritanishme, dhe pritet që rëndësi t'i kushtohet sidomos zvogëlimit të harxhimit dhe rritjes së fuqisë.

Ekziston mundësia që me modelin e ri 608 të vijnë edhe disa novitete, siç janë motorët benzinë V6 dhe V8, si edhe pritet të prodhohet një seri e cila e transmeton fuqinë në katër boshtet.

MILIONERË MBRENDA NATËS

Dy vëllezër nga Irlanda, njëri prej të cilëve ende është në shkollë të mesme, kanë shitur pjesët e aksioneve të tyre në kompaninë softuerike, dhe atë për hiç më pak se 2.5 milionë funte.

Shtatëmbëdhjetëvjeçari, John Collison, dhe vëllai i tij njëzetenëntëvjeçar Patrick, janë pronarë të pjesës dërmuese të kompanisë Automatic, të regjistruar në Shtetet e Bashkuara të Amerikës. Në fakt, kanë qenë, pasi kanë shitur pjesëmarrjen e tyre në kompani, mirëpo me plotë të drejtë tani mbajnë titullin e milionerëve më të rinj në botë.

Automatic është blerë nga kompania kanadeze, Live Current Media, e në garë për të thuhet të kenë qenë edhe dy kompani amerikane.

Kompania Automatic ofron shërbimin i cili iu mundëson shfrytëzuesve të eBay-it të menaxhojnë më lehtë me gjërat për të cilat konkurrojnë në ankande.