Hotelet që po lindin nga ëndrrat

Ka kaluar shumë kohë
që nga viti 717 pas Krishtit,
viti i përurimit të
"Hoshi Roykan", hotelit
japonez të shënuar në "Guinnes"
si i pari dhe më i vjetri në botë,
apo që kur hoteli "Pierre" në New
York ose "Meuruice" në Paris
kanë hyrë në histori. Tani synohet
për të tjera gjëra. Mjafton të
shohësh përreth për të kuptuar
se ku duhet t‘i prenotosh pushimet
e ardhshme, duke parë
edhe "projektet" e pazakonta që
arkitektët më të mirë nga e gjithë
bota do të na ofrojnë, duke lënë
pas dore ata që deri më sot janë
konsideruar më të bukurit në
botë. Me pak fjalë, i vetmi rregull
do të jetë se nuk do të ketë asnjë
rregull. Hotelet e së ardhmes
mund të lindin kudo dhe mund
të kenë çfarëdolloj forme. Mund
të jenë të vendosur mbi pemë,
në det, në mes të qytetit, madje
edhe në hapësirë. Tani duket se
ka ardhur vërtet koha për të dalë
nga hapësirat tradicionale për
të kënaqur turistët aventurierë,
apo fantazitë e arkitektëve të
talentuar, që janë munduar të
eksplorojnë gjithçka nga dizajni
i vendeve të pazakonta deri te
suitat fluturuese. Hotel posaçërisht
për të dashuruarit, për ata që
pëlqejnë detin, shkretëtirën apo
qiellin, do të ketë për të gjitha
shijet. Për më tepër me kaq shumë
luks brenda, mendohet se do
të vlerësohen jo me pesë por me
dhjetë yje, sigurisht me çmime
të kripura që do të shkojnë deri
në dhjetë mijë euro nata, duke ia
kaluar edhe gjigantit arab "Burj
Al Arab Hotel", ku, për të fjetur
një natë, duhet të paguash jo më
pak se 7000 euro. Por paratë nuk
vlejnë asgjë para kënaqësisë. Le ta
nisim me hotelet-pemë. Ndoshta
nuk do të jetë një zgjedhje komode,
por kontakti me natyrën është
një mënyrë e mirë për të rigjetur
vetveten. "Cheap dhe Chic" është
në fakt hoteli i dizajnuar nga një
arkitekt italian, që pritet të jetë
gati brenda një dhjetëvjeçari, e që
duke marrë parasysh shërbimet
dhe pamjen e tij të jashtme, përshtatet
me xhepat e të gjithëve. Për
këdo që është në kërkim të emocioneve
ekstreme, ka mundësinë
më të mirë për t‘u zhytur në blunë
e oqeanit, është interesante oferta
që bëhet nga një hotel në formë
guaske, i zhytur nën ujë, nga ku
mund të admirosh fundin e detit.
Utopia e një tende në shkretëtirë
i ka frymëzuar projektuesit për
t‘u propozuar të ftuarve të tij një
hotel me pesë yje, që të krijon
përshtypjen se je në mes të një
shkretëtire.
"Plaku" që nuk del nga
moda
"Burj Al Arab Hotel", i ndërtuar
në vitin 2002, ka në përbërjen e
tij 202 suita dhe çmimi për një
natë varion nga 2000 deri në
7000 dollarë. Ai ofron shërbimet
në nivelin më të lartë të imagjinatës,
një staf të specializuar
në mënyrë që çdo klienti të tij
të mos i mungojë asgjë. Është
ndër hotelet më të bukur dhe
sigurisht më të shtrenjtë në botë.
"Burj Al Arab Hotel" gjendet në
Dubai, në qytetin më të madh të
Emirateve të Bashkuara Arabe,
mes një ishulli dhe për ndërtimin
e tij janë dashur plot 18 muaj.
Hoteli është projektuar nga pesë
arkitektët më të mirë evropianë
dhe ka kushtuar më shumë se
100 milionë dollarë. "Burj Al
Arab" nuk ka dhoma. Ai ka 202
suita, është i ndërtuar tërësisht
prej xhami dhe të ofron pamje
të mrekullueshme nga Gjiri i
Arabisë. Secila nga suitat është
e kontrolluar nga një sistem i
avancuar teknologjie dhe është
e pajisur me të gjitha kushtet.
Aty mund të gjesh laptop, akses
për përdorimin e internetit,
faks, printer dhe fotokopje,
rrjet të fshehtë kompjuterësh
të një teknologjie të avancuar:
ndriçim, perde dhe kondicioner
me një shtypje butoni. Televizorë
42 polësh, plazma, video me
kërkesë, DVD dhe një varietet të
gjerë kanalesh kabllore. Përreth
plazheve të bardhë dhe ujit blu të
gjirit arabik, ju mund të zgjidhni
mes aktiviteteve të ndryshme
për t‘u argëtuar, ndërsa vendosni
të qëndroni në "Burj Al Arab". Pishina
të jashtme shumë të mira
në plazhet private, që mund t‘i
përdorni në mënyrë ekskluzive.
Gjithashtu mund të shëtisni në
hapësirat e shumta ose fushat
sportive, si dhe mund të merreni
me aerobi me trajnerët personalë
që hoteli ju vë në dispozicion.
Mund të shfrytëzoni edhe
banjat hidroterapike, masazhet
orientale, solarin dhe saunën.
Por tashmë, kjo nuk është më
një ëndërr. Lista vazhdon me të
tjera mrekulli.